Grønlands Tekniske Organisationi pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuummut nassuiaatit

 

Nassuiaatit nalinginnaasut

Ukiup ingerlanerani erngup akiisa allannguutissaat atortussanngortinneqannginneranni Inatsisartut Aningaasaqarnermut Ataatsimiititaliaannut akuerisassanngorlugit saqqummiunneqartarput.

Naalakkersuisut erngup akiisa akuersissutigineqartarnerata allanngortinneqarnissaa siunnersuutigaat taamaaliornikkut erngup akii atuutilersinneqannginneranni Inatsisartut Aningaasaqarnermut Ataatsimiititaliaannut akuerisassanngorlugit saqqummiunneqartarunnaarsillugit: taamaallaalli Naalakkersuisunut akuerisassanngorlugit saqqummiunneqartalersussanngorlugit.

Allanngortitsineq imeq pillugu akuersissutigineqartarnermut eqaannerulersitseqataassaaq, aammalu innaallagissap, erngup ungasissumillu kiassarneqarnerup akiisa akuersissutigineqartarneranni malittarisassat assigiilersinneqassallutik. Innaallagissap, ungasissumit kiassarneqarnerup aammalu nalunaarasuartarnikkut sullinneqarnerit akiisa allannguutaat atuutilinnginnerminni Inatsisartut Aningaasaqarnermut Ataatsimiititaliaannut saqqummiunneqartarunnaareerput.

Innaallagissap, ungasissumit kiassarneqarnerup erngullu akiisa allannguutaat Naalakkersuisunit akuerisat tusagassiorfiit aqqutigalugit saqqummiunneqartarnerat ingerlaannassaaq.

Aningaasaqarnikkut allaffissornikkullu pisortanut kingunissaat

Peqqussutissatut siunnersuut aningaasatigut pisortanut kinguneqarnavianngilaq.

Peqqussutissatut siunnersuutikkut allaffissorneq oqilisaanneqassaaq akimmi allannguutaasa Aningaasaqarnermut Ataatsimiititaliamut saqqummiunneqartarnerat suliassersuutaajunnaassammat.

Aningaasaqarnikkut allaffissornikkullu inuussutissarsiortunut kingunissai

Peqqussutissatut siunnersuut aningaasaqarnikkut allaffissornikkullu inuussutissarsiortunut kinguneqarnavianngilaq.

Avatangiisinut sunniutaasinnaasunik naliliineq

Peqqussutissatut siunnersuut avatangiisinut sunniuteqassanngilaq.

Oqartussaqarfiit il.il. tusarniaavigineqartut:

Naalakkersuisut Allattoqarfiat
Akileraartarnermi Pisortaqarfik
Aatsitassanut Ikummatissanullu Pisortaqarfik
Aqutsinermut Pisortaqarfik
Aningaasaqarnermut Pisortaqarfik
Naalakkersuisut Allattoqarfiata Inuussutissarsiornermut Immikkoortortaa
Aalisarnermut, Piniarnermut Nunaqarfinnullu Pisortaqarfik
Peqqinnissamut Pisortaqarfik
Avatangiisinut Pinngortitamullu Pisortaqarfik
Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik
Isumaginninnermut Suliffeqarnermullu Pisortaqarfik
Nukissiorfiit
Inatsisileriffik

 

Peqqussutissatut siunnersuummi aalajangersakkanut ataasiakkaanut nassuiaatit

 

§ 1-imut

Allassimasoq "§ 3, imm. 4 atorunnaarsinneqarpoq." isumaqarpoq erngup akiisa allannguutaat atuutilinnginnerini Inatsisartut Aningaasaqarnermut Ataatsimiititaliaannut akuerisassanngorlugit saqqummiunneqartarunnaassasut.

Tassa imaappoq suliassamik isumaginnittut innaallagissamut, imermut ungasissumillu kiassarneqarnermut akigititaat, kiisalu nalunaarasuaateqarnermut akigititaat, taamaallaat Naalakkersuisunut akuerisassanngorlugit saqqummiunneqartalissasut.

 

§ 2-imut

Siunnersuutigineqarpoq Inatsisartut peqqussutaat ulloq 1. juli 2002 atuutilissasoq.